HAPIT NA MOBALIK SA PAGKA INSURGENCY-FREE ANG LALAWIGAN SA BOHOL MATUD SA AFP UG PNP

Atol sa senimanang Capitol Reports nga gipahigayon sa kapitolyo, gibutyag sa 47th Infantry Batallion nga gi representaran ni Major Jayson Torino nga mo pa tigbabaw na gayud ang kalinaw sa lalawigang bol-anon. Diin gikatahong nahuyang na ang pwersa sa walhon nga grupo dinhi sa probinsiya ug possibleng hapit na mobalik sa pagka insurgency free ang lalawigan sa Bohol samtang nagkagamay ang pwersa sa mga rebeldeng new people’s army.

Gibutyag ni Torino nga sa pagkakaron naa nalang sa 10 ang armadong NPA nga nagpabilin sa bukirang bahin sa Bohol, apan wala nay kapasidad pa nga mohimo og dagkong kasamok sama sa paghimo og opensiba batok sa mga sundalo sa gobyerno, kini tungod kay matud pa nahigmata na ang mga Bol-anon sa hiwi nga kalihukan sa aramadong New People’s Army.

Dugang pa ni Torino nga duha ka semana ang milabay sa dihang nihimo sila og pagpatrolya diin naka diskubre og gidudahang harbour site sa mga rebelde. Samtang si Bohol Police Provincial Director Col. Usmondo Salibo mipayag nga “dismantled” ang kasamtangang sitwasyon sa mga communist terrorist group sa Bohol.

Kini basi matud pa sa pinaka-uwahing joint letter directive nga pinirmahan sa hepe sa PNP ug AFP Chief of staff. Dugang pa ni Salibo nga ni ubos na usab sa 34% ang criminality rate sa tibook lalawigan ug gipasabot niini nga sa pagkakaron wala nay serbisyo sa gobyerno nga mapakgang tungod sa mga armadong CTG.

Hinungdan nga gi-deklara nga dismantled ang sitwasyon sa mga rebelde sa Bohol. Mahinumduman nga tuig 2010 sa dihang gideklara ni kanhi Gobernador Erico Aumentado nga insurgency free na ang Bohol, apan nawala kini sa mga nisunod nga katuigan sa dihang mi-siaw ang kalihukan sa mga NPA og dihay mga panghitabo sa engkwentro tali sa tropa sa gobyerno.

Si Gobernador Aris Aumentado una nang namahayag nga usa sa gitotokan karon sa iyang administrasyon mao nga mabalik pagka insurgency free ang Bohol sama sa nahitabo sa panahon sa iyang amahan. Ang kalinaw usa sa mga dalan aron makab-ot sa usa ka probinsiya ang malambuon nga ekonomiya. (AEST)