GIPAKUSGAN SA BOHOL ENVIRONMENT PROTECTION TASK FORCE ANG PAGPANAKOP SA MGA NAGHIMO OG ILLEGAL QUARRY

Ang Bohol Environment Protection Task Force (BEPTF), nga gimugna ni Gob. Aris Aumentado, mitaho nga nangdakop sila sa mga malapason sa Provincial Ordinance No. 2020-035, nga naglatid sa Bohol Mineral Resources operations sa lalawigan sa Bohol. Sa ilang paglusad sa monitoring, ang task force nakasikwat sa 16 ka dump trucks nga dunay karga mga anapog, lima (5) ka backhoe ug usa ka bulldozer sulod sa 45 ka adlaw sa ilang operations, matud ni Task Force head Col. Eduardo D. Malig-on. Ang pagdakop nahimo tungod sa pakyas sa driver sa pagpresentar sa balidong ‘delivery receipt’ (DR) sa ilang karga, sama sa anaog, bas ug graba.

Ang pagdakop lakip na ang pag-impound sa mga sakyanang dunay karga, apan, wa’y mga DR sa kinaduolang police station ug himoan sa report ug ipasa ngadto sa Provincial Legal Office (PLO) sa kagamhanang probinsyal. Si Engr. Engr. Ana Luisa E. Galicinao, G.E, pangulo sa Bohol Mineral Resources Regulatory Office (BMinRO) nagpatin-aw sa mga silot kon dunay madakpan nga illegal transport sa mga karga.

Ang silot mao ang suspenso sa operations sulod sa 30 ka adlaw ug P5,000 nga multa isip unang silot. Sa ika-2 kalapasan, suspenso sa 45 ka adlaw ug mulata P5,000; ug ang ika-3, revocation sa permit ug P5,000 nga multa. Kon kahinumduman, gimando ni Gob. Aumentado nga hinloan ang quarry operations sa mga badlongon ug way gitahud nga paryente o higala kon kini nalalapas sa mining ordinance sa lalawigan. Iya usab nga gipasiguro nga ubos sa iyang adminstrasyon wala nay “Ivan” nga gikatahong nangilkil sa kwarta sa mga quarry operators sa niaging pamunoan.