CHOCOLATE PRINCESS SA BOHOL DALAREICH POLOT NAKADAWAT OG LAING PASIDUNGOG

Ang gibansagang Chocolate Princess sa Bohol nga si Dalareich Polot nakadawat og laing pasidungog. Ang 34 anyos nga batan-ong entrepreneur ug founder sa Ginto Fine Chocolate ug Dalareich Chocolate House InLife Young SHERO of the Year sa 2022 Asia Circle of Excellence Award. Gumikan kay si Polot tua sa California, ang iyang igsoon nga si Irene maoy nidawat sa pasidungog kagahapon, Oktobre 11, didto sa Marriott Grand Ballroom, Pasay City. Sa usa ka pamahayag, si Asia CEO Awards President Rebecca Bustamante miingon nga ang Asia CEO Awards awardees gipili alang sa ilang achievements ug mga natampo ngadto sa ilang mga kliyente, staff ug sa nasud.

Dungan sa maong pasidungog, gidawat usab ni Polot ang international prestihiyosong awards nga Goldman Sachs/ Fortune Most Powerful Women Global Award didto sa California. Ang proposal ni Polot mao ang pagpahiuli sa cacao industry dinhi sa Bohol nga naapektohan sa pinakakusog nga bagyong Odette sa nakalabay nga tuig. Suma niya nga dako na hinoon ang iyang pagtuo nga mapili aron mapasidunggan sa maong programa diin timing matud pa ang kahigayunan nga mahatagan og pondo ang pagpahiuli sa cacao industry sa Bohol diin siya nalakip niini ilabi pa nga gikan sa maong industriya ang iyang mga nakab-ot nga kalampusan karon.

Ang Goldman Sachs/Fortune Most Powerful Women Global Award magtangag usab kini og usa ka cash grant nga maoy gamiton sa rehabilitation sa cacao industry sa Bohol. Gawas sa pasidungog nga madawat ni Polot, mahatagan usab siya og kahigayunan nga maka himamat sa mga iladong babaye sa tibook kalibutan, ug mga negosyante, og labaw sa tanan, iyang mapaila-ila pa og maayo ang Probinsya sa Bohol sa nasud og sa kalibutan. (AEST)