Tungod sa panglantaw ni Gobernador Aris Aumentado nga pangusgan niini ubos sa iyang administrasyon ang pagwagtang sa mga kotong o IVAN sa mga quarry operators, ni-triple ang kantidad sa koleksyon gikan sa operasyon sa quarry dinhi sa Bohol sa dihang misugod og lingkod si Aumentado sa kapitolyo ug nawala ang Mr. Ivan nga tigpangolekta og kickback gikan sa mga negosyante.
Si Engr. Ana Luisa Galicinao hepe sa BMinNRO mibutyag nga misaka og maayo ang ilang koleksyon sa paglingkod sa bag-ong administrasyon ni Aumentado.
Sa tala sa ilang buhatan mikabat sa 10 milyones pesos ang tax collection gikan sa extraction sa mga minirales sa buwan sa Hulyo hangtud sa Nobyembre ning tuiga kung asa misugod og lingkod sa kapitolyo si Aumentado. Mas taas kini itandi sa buwan sa Enero hangtud Hunyo ning tuiga nga naa lang sa 3.9 milyones pesos nga koleksyon.
Gikatahong misaka usab ang gidaghanon sa mga nadakpan o kadtong nagpahigayon og illegal quarry sa pagsugod sa Aumentado administration, tungod sa striktong pamaagi ug pagsunod sa insaktong proceso, diin gikan sa buwan sa Hunyo hangtud Nobyembre mi-abot sa 22 ang nadakpan. Mas taas kini sa 1 lang ka nadakpan sa milabay’ng 5 ka buwan.
Misaka usab ang kantidad sa ilang natala nga fines and penalties sa panahon sa Aumentado administration nga nikabat sa P259k gikan sa Hulyo hangtud Nobyembre, itandi sa P35k sa unang unom ka buwan sa tuig 2022.
Mahinumduman nga una nang gibutyag ni Gobernador Aumentado atol sa iyang 100 days sa serbisyo nga sulod lang sa 3 ka buwan mi-triple ang koleksyon sa quarry permit fees gumikan sa pagkawagtang sa “Ivan” sa kapitolyo.
Tungod niini hinay-hinay nang nakab-ot ang mga panglantaw ni Gobernadro Aris Aumentado sa giingong limpyong pang gobyerno ug unahon ang mga bol-anon.
