Si Gobernador Aris Aumentado nagkanayon nga uban ni Special Assistant to the President (SAP) Antonio Manuel Lagdameo sa Malacanang ilang nahisgotan ang mahitungod sa Bohol-Cebu bridge ug ang plano nga mobutang sa “industrial zone” sa Bohol. Kini mitumaw atol sa iyang paghimo sa “courtesy visit” sa Malacanang gahapon, diin iyang gipresentar ang mga plano sa iyang pamunoan, sama sa “food security.” “Hangyo kita na mahatagan ug tabang ang atong mga mag-uuma ug mangingisda ilabi na kay ang Office of the President ang nag dumala sa Department of Agriculture,” matud sa gobernadora sa iyang facebook post.
Si Aumentado midugang sa pag-butyag nga “Masaligon si SAP na mo supporta sa atong mga hangyo isip pagpakita na ganti usab nila sa atong support na mga Bol-anon ngadto ni President Bongbong Marcos (PBBM).” Sibo sa panlantaw sa gobernador, ang Metro Pacific Tollways Corp. (MPTC) mihatag sa konsiderasyon sa pagtukod sa Bohol-Cebu bridge nga magdugtong sa lalawigan sa Bohol ug Sugbu.
Ang laraw sa maong tulay tadlas sa dagat sa lungsod sa Cordova, Cebu ngadto sa Getafe, Bohol mokabat sa P90 billiones. “Gov. Gwen [Garcia] has asked us to look at building a bridge from Cordova to Bohol. That’s a P90 billion project. Financing is key because it’s a very big project,” matud ni Manuel V. Pangilinan, chairman of MPTC. Apan, mohimo pa ang kompaniya sa usa ka pagtuon (feasibility study) tungod kay kon taas ra ang taripa sa paggamit sa tulay, basin wa’y mogamit niini, matud ni Pangilinan. Ang Cebu Cordova Link Expressway Corp., usa ka sanga nga komaniya sa MPTC, mao ang nagtukod sa P31 billion Cebu-Cordova Link Expressway (CCLEX), nga may 8.5 km ang gilay-on nga nagdugtong sa Cebu City ug sa Cordova, Mactan island. (rvo)