Moduyog ang Probinsya sa Bohol sa pagsaulog sa World Tourism Day pinaagi sa pagpahigayon sa ikaduhang World Tourism Day Fun Run karong Septiyembre 27, 2022. Nagpadayon karon ang rehistrasyon sa interesado mo apil sa Bohol Tourism Office (BTO) sa Old Eskwela Las Ninas Building.
Ang mosalmot sa maong kalihokan mahimong moapil sa 5KM o 10KM nga kategorya ug mobayad sa kantidad nga P400 ug P600 matag usa. Gilangkuban sa registration fee ang finisher medal, event shirt, pamahaw, ug kahigayonan nga makadaog og premyo sa raffle. Ang mga magdadagan mobiyahe sa Old Capitol – Balay ni Letson JA Clarin- Petron San Isidro – karaan nga ruta sa Kapitolyo nga adunay 5KM turning point duol sa Nice Carwash.
Cash prizes ang madaogan sa top 10 finishers sa duha ka kategorya ug mga minor awards para sa ubang partisipante. Gipasiugda ang ikaduhang World Tourism Day Fun Run sa pakigtambayayong sa Panggamhanang Probinsiya sa Bohol, pinaagi sa Bohol Tourism Office, sa Bohol Adventure and Fitness Team (BAFT).
Ang World Tourism Day gisaulog matag tuig aron matimaan ang pagkatukod sa United Nations World Tourism Organization. Ang tema sa maong programa karong tuiga “Rethinking Tourism.”
