Gibanhaw pag-usab sa kagamhanan sa Bohol uban sa mga hingtungdang ahensya ang Bohol Danajon Bank double barrier management council pinaagi sa paglagda sa usa ka memorandum of agreement kon MOA.

Ang department of environment and natural resources (DENR) nga maoy lead convenor sa Danajon Bank maoy nangulo sa MOA signing tali sa kagamhanang probinsyal sa pagpanguna ni Gobernador Aris Aumentado ug mga mayor sa 10 ka mga lungsod nga apil sa konseho. Ang Danajon Bank double barrier usa ka importanteng bahin nga mapanalipdan sanglit usa kini ka unique nga makita lang kini sa unom ka lugar sa tibook kalibutan og sa pilipinas nahimutang lang usab kini sa kabisay-an lakip ang Bohol.

Sa Danajon bank naa tanan ang mga buhilaman sa dagat ilabi na ang mga isda nga maoy nag-unang panginagbuhian sa mga resindente nga nanimuyo sa 10 ka mga coastal town sa Bohol. Ang subling pagbanhaw sa konseho dakong tabang aron maaktibo ang mga LGU nga apil niini sa pagpanday og mga palisiya alang sa pag protekta sa kinaiyahan. Ang pag preserbar sa kina-iyahan sama rasad sa pag-amping sa atong kaugmaon.