Atol sa gikatakdang SK Congress nga pagasugdan karong umaabot adlaw September 29 hantud sa October 1. Panahon na matud pa nga hatagan og kahigayunan ang mga opisyal sa Sangguniang Kabataan (SK) sa tibook Bohol nga matubag ang ilang mga pangutana ug ubang concern kabahin sa ilang mga na atubang nga problema sa ilang pagpangatungdanan isip lider sa mga kabatan-onan.

Suma ni Bohol SK federated president ug ex-officio board member Christian Victor Bolos III nga sa maong aktibidad mapasabot sa mga opisyal sa SK ang pipila ka mga isyu ug concern sa ilang mga ginsakpan labi na gayod kay kadaghanan maglisod ug reach out sa ilang mga sakop nga batan-on. Dugang pa ni Bolos, usa sa isyu sa mga SK mao ang mga penalty nga gibayran ngadto sa BIR nga wa usab kaayo mapasabot, labi na gayod ang paggamit sa ilang matag budget.

Diin lakip na usab kini nga hisgutan sa umaabot SK Congress sa lalawigan aron mahimuslan ug duna pa silay mahimo sa ilang nahibilin nga termino. Ang mga taga DILG maoy resource speaker sa himoong SK congress alang sa mga legalidad nga isyu ug concern, samtang gipaabot usab nga motambong ang commissioner sa National Youth Commission.

Gi-awhag ang tanang SK official nga motambong sa maong kalihukan aron sa hapsay ug linaw nga masabtan sa mga kabatan-onan nag dapat nilang papel sa ilang matag barangay. Ang SK congress gi-abagan usab sa Barangay pinaagi ni Bohol ABC president og ex-officio board member Romulo Cepedoza ug uban pang mga opisyales isip suporta sa kabataang sector sa lalawigan sa Bohol.