MOA GIPIRMAHAN ALANG SA PAGMUGNA OG DUGANG MARINE PROTECTED AREA NGA GILANGKUBAN SA UPAT KA MGA LUNGSOD

Gikasabutan sa upat ka mga lungsod sa este nga bahin sa Bohol nga maghulma sa gitawag nilang “DUGJAN,” sa tinguha nga maka-establish og dugang sa Marine Protected Area (MPA) dinhi sa probinsya. Ang DUGJAN nagpasabot sa 4 ka mga pangan sa lungsod nga mao ang Duero, Guindulman, Jagna ug Anda kinsa nagnilagdaay sa ilang Memorandum of Agreement (MOA) aron sa pagpasulong sa kabilihon sa pagpanalipod sa mga katungod sa mga gagmayng mangingisda ug sa paggamit sa kadagatang nahisakop niini.

Si Duero Mayor Al Taculad, Guindulman Mayor Ben Balo ug Anda Mayor Angelina Simacio mipirma sa naasoyng MOA, gawas ni Jagna Mayor Joseph Ranola, kinsa wala sa maong okasyon nga gilusad sa SP session hall, new Capitol. Tagbilaran City kahagapon. Si Gov. Aris Aumentado milagda usab sa MOA ingon man si regional director Engr. Paquito Melicor sa Department of Environment and Natural Resources (DENR7) lakip usab si Regional director Allan Poquita sa Bureau of Fisheries and Aquatic Resources (BFAR). Si Melicor sa iyang mensahe mi-awhag sa upat ka mga silingang lungsod nga magtinabangay kung unsay mga angayang buhaton og ipatuman nga mga palisiya aron ma proteksyunan ang tagsa tags aka mga MPAs.