Pag edukar sa publiko maoy usa sa hingusgan sa bag-ong hepe sa Bohol PNP sa padayong pakigbatok sa illegal nga droga.
Dugay nga problema sa katilingban ang druga, busa usa gihapon kini sa mga totokan sa bag-ong hepe sa kapolisan sa Bohol kabahin sa kampanya batok sa illegal nga droga mao ang pag edukar sa publiko.
Matud ni Col. Lorenzo Batuan nga gawas sa padayon nga pagpanakop sa mga tigpayuhot og shabu dinhi sa Bohol, plano usab niini nga pakusgan ang pag edukar sa publiko kung unsay dili maayong ikatabang sa paggamit sa illegal nga droga ilabi na sa mga kabataan.
Suma ni Batuan nga kung walay mogamit og shabu wala usab mamaligya niini, hinungdan nga importante alang kaniya ang programa nga maghatag og saktong edukasyon sa katawhan.
Matud ni Batuan nga kaabag sa himoon nga education campaign batok sa droga mao ang Philippine Drug Enforcement Agency (PDEA).
Gibutyag usab sa opisyal nga sa himoon nga operasyon batok sa illegal nga droga, sundon gihapon nila ang saktong proseso sa balaud sa pagpanakop sa mga nalambigit sa illegal nga kalihukan.
Dugang niini kinahanglan usab nga respetohon ang katungod sa usa ka tawo nga mabuhi, apan kon mahimong alanganin ang kinabuhi sa kapolisan kinahanglan usab sila nga manalipod sa kaugalingon.
Kauban ang PNP Bohol sa kampanya batok illegal nga drug nga maoy gustong mahitabo ni Gobernador Aris Aumentado nga mahimong “zero in drug cases” ang lalawigan sa Bohol.
