Mahinumdoman nga usa sa mga tutokan ni Gobernador Aris Aumentado ang kahapsay ug kalinaw sa lalawigan pinaagi sa Provincial Peace and order council kini aron masiguro ang luwas nga kahimtang sa mga turista nga mobisita sa lalawigan diin naila ang Bohol isip usa ka tourist destination.

Malipayong gidawat ni Gobernador Aris sa miaging adlaw ang recognition gikan sa Department of Interior and Local Government (DILG) 7, uban sa Regional Peace and Order Council (RPOC)7. Nagpasalamat ang gobernador kang Dir. Leocadio T. Trovella,CESO III, chairman sa Regional Audit Team ug sa tanang membro sa team.

Ang probinsya sa Bohol giila nga usa sa mga Functional Peace and Order Council sa rehiyon gumikan sa mga exemplary performances sa milabay nga mga tuig.

Matod sa gobernador nga ang maong pasidungog iyang gipahinongod ngadto sa mga Bol-anon ug sa milabay nga administrasyon, sa ilang pagdumala kaniadto, midawat ang Bohol sa pasidungog karon bahin sa Peace and Order.

Iya kini giisip nga inspirasyon. Ang E.O. No.11 Series of 2022 niadtong buwan sa Agosto sinugdanan pa lang sa daghang plano nga pagabuhaton sama sa kampanya pagpasurender sa mga NPA diin aduna na’y mibalik sa sabakan sa gobyerno.

Ang pag surrender ni Navas usa sa mga lakang nga posibleng madeklarang insurgency-free ang tibuok lalawigan sa Bohol. (AEST)