Mokabat sa 22 milyones ang kantidad sa gituohang nasakmit nga shabu sa mga otoridad sulod lang sa 10 ka buwan, mo average kini sa halos 2.2 milyon ang masakmit sa illegal nga druga matag buwan.

Gika-alarma na kini sa mga kapolisan, hinongdan nga si Bohol Police Provincial Director Lorenzo Batuan magmugna ug mas lig-on nga composite team sa pakig batok sa illegal nga kalihukan sa druga.

Si Batuan mibutyag nga usa sa solusyon aron mahinay-hinay ug ka sulbad ang maong illegal nga kalihukan mao ang “drug demand reduction” diin target niining e-edukar ang katawhan kung unsa ka daotan ang epekto sa druga sa mga tawo.

Matud pa ni Batuan, hangtod adunay mopalit ug druga sa lalawigan, magpadayon nga mosolud ang tig suplay dinhi sa Bohol. Dako usab ug mamahimong papel ang buhatan sa Center for Drug Education and COunseling (CEDEC) nga gipangulohan ni Dr. Yul Lopez.

Suma ni Lopez, andam ang buhatan sa CEDEC nga makig alayon sa gobyerno labi na sa mga kapolisan ug ubang sektor nga gitahasan sa pagsugpo ning illegal nga druga, labi na gayod ang pag monitor sa mga niundang na ug gamit sa druga.

Ug dugang pa, usa sab sila sa mga mo-edukar sa mga kabatan-onan labi na sa mga tulonghaan sa lalawigan nga target sa buhatan sa CEDEC nga makapahigayon ug orientation.

Hinoon sa pagkakaron matud pa ni Batuan 51% na sa mga kabarangayan sa lalawigan ang gideklarang drug cleared sa PDEA Region VII.