Ang reward system nga giplano sa Bohol Police Provincial Office (BPPO) kabahin sa pakigbatok sa illegal nga drugas dinhi sa probinsya ang hugot nga gisuportahan ni Gobernador Aris Aumentado
Kini sumala ni BPPO Provincial Director Col. Lorenzo Batuan samtang gipanawagan niya ang publiko nga motabang sa kampanya batok sa ginadiling drugas.
Atol sa usa ka press briefing didto sa Camp Francisco Dagohoy, si Batuan miingon nga iyaha nang nasulti sa gobernador sa ilang panagtagbo kagahapon, ang iyang sugyot nga hatagan og ganting salapi ang mga sibilyan nga makahatag og impormasyon sa mga illegal nga drugas nga ipasulod dinhi sa Bohol.
Prayoridad karon sa kapolisan ang pagsugpo sa iligal nga drugas nga maoy marching order usab ni Aumentado.
Matud sa hepe sa kapulisan sa probinsiya nga gipangusgan nila karon nga maminosan ang panginahanglanon ug suplay sa gidiling drugas nga kasagaran gikan sa silingang probinsya sa Cebu ug Leyte nga gipalusot sakay sa mga pumpboat.
Giangkon ni Batuan nga dili nila maapas og bantay ang baybayon sa tibuok probinsya tungod sa kadaghang agianan sa Bohol busa nagkinahanglan sila sa tabang sa komunidad.
Gipahibalo usab sa provincial director sa Bohol PNP nga giumol na og bag-ong anti drug team nga maoy motutok sa kampanya batok sa illegal nga drugas.
Samtang, gawas sa drug demand reduction ug reduction of supply, nagpadayon usab ang drug clearing operations sa mga kabarangayan diin 51% na kun kapin na sa katunga sa 1,109 ka barangay sa tibuok lalawigan ang drug-cleared na samtang 44 ang gipailawom pa sa evaluation sa regional oversight committee nga gipangulohan sa Philippine Drug Enforcement Agency kun PDEA-7.
