Gilusad niadtong Nobyembre 22, 2022 sa mga kadagkuan sa Task Force Isda pinaagi sa Isda Program ang pag-abli ug bag-ong stall sa Dao public market, mas gipalapadan ang maong program gikan sa daang Tagbilaran City Airport, gilakip na karon sa lalawigan sa Bohol ang merkado publiko sa dakbayan sa Tagbilaran.
Sugod kagahapong adlawa, Martes, naa na sa Tagbilaran City Central Public Market o mas nailhan nga Dao Public Market ang Isda program nga gimugna ni Gobernador Aris Aumentado. Nahimutang sa Stall No. 31 sa City Central Public Market ang Isda Program sa kagamhanang probinsiyal sa Bohol.
Ang Isda program gimugna sa administrasyong Aumentado isip tubag sa panawagan sa publiko aron matubag ang dugay nang problema sa mahal nga isda dinhi sa probinsiya.
Kini usa ka lakang sa kasamtangang namunuan sa Kapitolyo nga gidesinyo aron mapaubos ang nanghinobrang presyo sa isda dinhi sa Bohol.
Una nang miangkon si Provincial Administrator Aster Caberte nga dili sayon ang pagsulbad sa usa ka butang nga dugay na nga gilakip isip bahin sa lokal nga ekonomiya busan gikinahanglan ang pagtinabangay sa nagkalain-laing ahensiya ug local government units pagsulbad sa maong problema.
Gawas sa merkado dinhi sa siyudad, gitinguha usab nga makaabot sa mga kalungsuran ang Isda program sa Kapitolyo nga nagbaligya og mga baratong isda gikan sa laing probinsiya ug dinhi ra sa Bohol.
Kining maong lakang dakog tabang labi nga hinay-hinay nga makab-ot ang dugay ng gipaabot sa mga bol-anon nga baratong isda sa lalawigan aron sa ingon dili kaayo maapektahan ang ilang adlaw-adlaw nga kita.
