Mokabat 80 ka mga pulis sa Bohol Police Provincial Office (BPPO) ang gipaubos sa lima ka adlaw nga “Disaster Preparedness, and Search, Rescue and Relief training.”
Gibuksan niadtong Lunes, Nobyembre. 21, 2022 ang kalihukan nga gipangulohan ni BPPO Provincial Director Col. Lorenzo Batuan sa Camp Francisco Dagohoy ning siyudad sa Tagbilaran.
Atoa usab ang presensiya ni Police Col. Antonietto Cañete, hepe sa Regional Community Affairs and Development Division (RCADD) sa Police Regional Office (PRO-7), kinsa gipasidunggang bisita sa pagbukas sa kalihukan, miingon nga ang tumong sa pagbansay-bansay mao ang pagseguro nga andam ang kapolisan sa pagtubag sa kalamidad, mugna sa tawo man o kinaiyahan ug pagdeploy sa search and rescue operations.
Kining maong pagbansay-bansay molungtad og lima ka adlaw naglakip na sa kahanas sa pagluwas pinaagi sa first aid, basic life support, boat-handling, rope tying,pag-deploy sa mga buoy ug mga himan nga makaluwas sa kinabuhi, ug pagtangtang sa mga debris sa nahugnong mga istruktura.
Suma ni Cañete, ang Search, Rescue and Relief training subay kini sa KASIMBAYANAN kun Kapulisan, Simbahan, at Pamayanan nga programa ni PNP Chief Rodolfo Azurin Jr.
Kining maong aktibidad sa pagbansay-bansay may kalabotan sa pagpangandam sa kalamidad giabagan sa Philippine Coast Guard (PCG), Bureau of Fire Protection ug kagamhanan sa lalawigan sa Bohol pinaagi sa Provincial Disaster Risk Reduction and Management Office (PDRRMO).
Kini aron kung ugaling adunay mga kalamidad, malikayan ang mga casualties ug masiguro usab ang seguridad sa katawhang bol-anon.
