Tungod sa padayong pagsaka sa ihap sa mga aksidente sa kadalanan si Bohol Police Provincial Office (BPPO) Provincial Director, Col. Lorenzo Batuan mihatag ug kamanduan sa 48 ka mga chief of police nga mohimo og mga lakang aron matubag ang makapaalarma nga ihap sa mga aksidente sa kalsada dinhi sa lalawigan sa Bohol.

Sa datos sa BPPO sulod lang sa usa ka semana gikan sa Nobyembre 14 hangtod 20, 2022, mikabat sa 40 ang nahitabong aksidente sa dalan sa lain-laing lungsod diin 24 ka tawo ang naangol, 14 ang miresulta sa pagkadaut sa kabtangan samtang 2 ang patay nga pulos nahitabo didto sa lungsod Candijay.

Sa maong ihap, 34 ang nasulbad na, 2 ang case cleared ug 2 ang wa pa masulbad.

Base sa tala sa 40 ka Traffic Related Incidents (TRI), ang dakbayan sa Tagbilaran maoy pinakadaghan nga miabot og 5, tag upat sa lungsod sa Panglao ug Lila, tag-duha sa mga lungsod sa Candijay, Tubigon, Ubay, Dauis, Garcia Hernandez, Jagna, Mabini, maribojoc ug Sagbayan samtang tag-usa ang natala sa mga lungsod sa Anda, Balilihan, Buenavista, Catigbian, Clarin, Duero, Loboc, Loon ug Sevilla.

Kini gikan sa Enero hangtod sa kasamtangan, miabot sa 1,172 ang nahitabong aksidente sa kalsada diin pinakadaghan gihapon sa siyudad nga mikabat og 351.

Suma ni Col. Batuan, ang pagluag sa mga restrictions gikan sa kapin duha ka tuig nga higpit nga paglihok maoy iyang nakita nga rason sa pagdaghan sa mga aksidente sa kadalanan diin kasagaran niini ang hinungdan mao ang human error o sayop sa tawo.

Dugang pa ni Batuan nga dapat ang mga hepe sa kapolisan nga makig-coordinate sa mga lokal nga kagamhanan, Department of Public Works and Highways (DPWH), Department of Education (DepEd) ug uban pang ahensiya sa gobyerno aron masolusyon ang problema sa kaluwasan diha sa kalsada.

Kini tungod kay adunay mga langyaw usab nga nalambigit sa mga traffic accident, gimanduan usab sa PNP Provincial director ang tourist police unit nga mohimo og mga lakang aron mahatagan usab og mga kasayuran ang mga turista kalabot sa road safety.

Dugang pa niya, makig-coordinate usab siya sa Land Transportation Office (LTO) alang sa deputization sa mga pulis aron sa ingon mahan-ay pag-ayo ang matag operasyon sa kapolisan ug usab ang pagpatuman sa balaod sa kadalanan.