Gisugdan na sa Task Force ISDA ang pagbutang ug mga stalls sa kamerkaduhan isip kabahin sa paningkamot sa kapitolyo nga mabati sa mga konsumedor ang baratong isda.
Si Salvio Madanguit sa Office of the Provincial Agriculturist miingon nga sa pagkakaron duna nay naka display nga isda sa Tagbilaran Central Public Market maingon man diha sa Causeway og isunod ang mga merkado sa Cogon, Manga ug uban pa.
Gawas sa Tagbilaran mobutang usab og display ang Task Force ISDA sa mga merkado sa lungsod sa Baclayon, Panglao, Dauis ug uban pa.
Ang maong lakang subay na usab sa hangyo sa publiko ilabi na niadtong layoan mopalit og isda nga barato diha sa Tagbilaran City Old airport.
Gipasabot usab ni Madanguit nga ang gihimong lakang sa Task Force ISDA dili kompetensya sa ubang mga negosyante kon dili pagpaabot og mensahe nga mopaubos usab sa ilang mga baligya nga produkto.
Sa pagkakaron dunay tulo ka mga regular nga supplier og isda sa programa sa kapitolyo.
Ang tulo ka mga supplier gikan sa Surigao, Zamboanga ug Gensan.
Apan suma ni Madanguit nga pulos ra hinoon ni sila mga Bol-anon ang maong mga supplier nga buot usab motabang sa Isda Program sa kapitolyo aron makatabang usab sa mga Bol-anon nga nag-atubang sa kamahal sa presyo sa isda sa dugay na nga panahon.
Gawas sa tulo matud ni Madanguit nga duna pay posibling madugang nga mga supplier diin padayon usab karon ang gihimong mga negosasyon.
Lakip usab sa source nga gikuhaan sa task force isda mao ang mga lokal nga mga organisasyon sa mga mananagat sa Bohol.
