Gipanguluhan ni Bohol Governor Erico Aristotle “Aris” Aumentado, isip Regional Development Council (RDC) Central Visayas Region Chairman, ang 4th Quarter RDC Full Council nga gipahigayon karon adlawa, December 6, sa Quest Hotel, Cebu City.

Sa iyang pasiunang mensahe, gipahinumduman ni Gov. Aumentado ang tanang miyembro na kinahanglang ang matag matang na pagabuhaton sa RDC makahatag ug kaayuhan sa tibuok rehiyon ug mga katawhan niini. Iyaha usab gilakip sa iyang mensahe na kinahanglang magtinabangay ang tanan aron magpabiling ASF-free ang tibuok rehiyon.

Sa maong panagtapok, gihisgutan sa mga miyembro ang mga nagkadaiyang isyu gikan sa nagkalain-laing sektor ug ang paghatag og suporta kabahin sa mga inisyatibo na makalig-on sa mga lokal na mga prodyuser o “Buy Local” ug pagmugna sa mga local housing boards.

Nahisgutan usab sa maong council meeting ang kabahin sa pagsaka sa taripa ug terminal fee sa Tagbilaran City Port ug update kabahin sa gapadayong Panglao-Tagbilaran City Offshore Bridge Connector Project.

Natuki usab sa maong council meeting ang kabahin sa usa ka position paper nga gipadala sa Bohol Chamber of Commerce and Industry, Panglao Island Chamber of Commerce and Industry, ug Construction Association Bohol sa RDC mahitungod sa pagsaka sa terminal fee ug uban pang bayrunon sulod sa Tagbilaran City Port nga walay gipahigayong public consultation sa maong dakbayan ubos sa bag-o port management provider (GlobalPort).

Gidawat sa mga miyembro niini ang rekomendasyon na muhangyo sa PPA Steering Committee and TWG alang sa pagtuki (review) sa AO Nos. 09-2019 ug 10-2019 ubos sa Port Terminal Management and Regulatory Framework. Kini aron makita kung aduna bay mga kakulian sa pagsaka sa ug napatuman ba ang saktong proseso.

Gipahigayon usab sa maong aktibidad ang awarding ceremony para sa Search for Outstanding Volunteers sa RDC 7, NEDA 7, ug Philippine National Volunteer Service Coordinating Agency (PNVSCA) para sa Rehiyon 7.

Ang mga mananaog mao sila Mr. Zacarias C. Mansing, usa ka PWD gikan sa Banilad, Dumaguete City (Individual (Adult) Category); Ms. Clareziel D. Ladringan, usa ka magtutudlo sa Cebu Normal University ug gagikan sa Baclayon, Bohol (Individual (Youth) Category); Base Camp Emergency Response Team, Inc. (BCERT) gikan sa Cebu (Organization (Non-profit) Category), ug Siyudad sa Bayawan, Negros Oriental alang sa Special Award for LGU.

Gisaksihan usab nila ang pagpanumpa ni Mr. Kenneth Cobonpue isip Co-Chairperson sa RDC 7 sa pagsugod sa maong meeting.