Mahinumduman nga una nang gikonsiderar sa kagamhanang probinsiyal sa Bohol ang pagtukod ug dakong convention center ug IT Park sa daan nga Tagbilaran City Airport. Kini ang usa sa mga panglantaw ni Gobernador Aris Aumentado tungod sa kakuwang ug pasilidad nga tigumanan sa lalawigan.
Ang planong pagtukod ug usa ka convention center dakong oportunidad sa Bohol alang sa pag-host og mga nasudnong panagtapok sa mga organisasyon ug asosasyon.
Kini ang usa sa mga diskusyon ni Gov. Aris Aumentado ug Secretary Jaime Bautista sa Department of Transportation (DOTr) sa Civil Aviation Authority of the Philippines kon (CAAP) sa niaging buwan, diin ang usa sa mga agenda sa duha ka opisyal naglangkob sa plano ug mga pamaagi aron mahimong possible ang pagamit sa daang airport pinaagi sa tukorong IT park ug convention center.
Tungod niini ang maong panglantaw posibleng mahitabo na, diin mihatag og inisyal nga 50 milyon pesos si Senadora Imee Marcos para sa construction sa giingong Bohol Convention Center, diin usa kini sa hangyo ni Gobernador Aris Aumentado sa tumong nga magamit kini isip Convention Center para sa MICE Tourism kon (Meetings, Incentives, Conference and Exhibitions) usa ka paagi aron mas makahatak pa ang lalawigan og mga turista nga mobisita sa Bohol.
Samtang una nang mibutyag si DOTR Sec. Bautista kang Goberndor Aumentado nga mosumiter og proposal alang sa karaang airport nga iyang ipresentar ngadto sa executive board sa CAAP.
Ang maong panglantaw sa gobernador posibleng usa sa mga lakang aron mas molambo pa ang ekonomiya sa probinsiya sa Bohol.
