Nagplano ang Provincial Veterinary Office nga mo-umol og usa ka task force nga maoy mo totok aron mapugngan ang pagsulod sa kaso sa African swine fever dinhi sa Bohol nga mikatap na sa nagkadaiyang dapit sa nasud.
Atol sa budget hearing nga gipahigayon gi-pahibaw ni Dr. Stela Marie Lapiz sa mga sakop sa committee on finance, budget and appropriation ang plano nga magmugna og Bohol ASF inter agency task force.
Gipasabot ni Lapiz nga ang pagmugna sa task force isip pagpangandam kon ugaling masudlan ang Bohol og kaso sa ASF diin dunay mga personahe nga matahasan sa paghimo og mga pamaagi og unsaon pagtubag ang problema.
Ang sayo nga pagtubag kon dunay makasulod nga kaso matud ni Lapiz nga mapaspasan usab ang pag eliminate sa problema og mapugngan ang pagkuyanap sa sakit.
Matud ni Lapiz nga langkuban og 7 ka task force nga mao ang Surveillance task force; Information task force; Resources and logistic; Local governance; Public security; Information and communication; Food security; Emergency preparedness and response.
Ang pagmugna sa maong task force ipaagi usab sa usa ka executive order ni Gobernador Aris Aumentado nga maoy magsilbi nga chairman sa maong task force.
Sa pagkakaron nagpadayon ang Provincial Veterinary Office sa mga lakang aron mapakgang ang pagsulod sa mga produkto ug buhi nga baboy nga gikan sa mga ASF affected area.
Suma ni Lapiz nga duna nay gipamutang nga mga sniffing dogs sa mga pantalan sa Bohol kansang mga kargamento sa mga barko gikan sa Mindanao nga dunay daghang kaso sa ASF.
Ang Provincial Veterinary Office nigahin og 17 milyones pesos nga pondo para sa sunod tuig alang sa program ug kampanya batok sa ASF. (AEST)
